کوردستان؛ چشم و چراغ ایران؟ از کوردستان تا تبریز؛ صبر ما شدە لبریز!
کاتی بیستنی ئەو دروشم و شوعارانە هەست بە چی دەکەی؟
نە ببورە؛ بیر و بۆچوونت چییە؟
بیرت لێ کردووە، بیرێکی قووڵ و داچوونێکی بنەرەتی؟
ئەگەر جودا لە هەستێکی کاتی و چەند خولەکی لە شایی و شاگەشکەیی هیچ جۆش و پەرۆش و و ترس و تارماییەک داتناچڵەکێنێت یا رەگەزپەرەستێکی لووتبەرزی دەماراوی کوردی کە بە بیستنی ئەو دروشمانە دەمارت گرژتر و لووتت بەرزتر دەبێت، خۆت لە سۆز و جۆشی بەکوڵهاتوو و پێشێلی لە ناکاوی بەردەنگی بەربڵاوی ئەم وشانە لادە. بەرزی لووتی تۆ لە نزمی ئاوات و کورتی نیگا و تەسکی بیروڕاتە و لە پشت حەشارگەی فیز و پۆزت شوێنپێی بەجێماوی گەندەڵی و خوێن و خەیانەت و دەسەڵاتی ناڕەوای خۆت و بن و بنچینەی لەخۆباییت دیارە!
بەردەنگ تۆی،
تۆ کە ناوچەگەرێتی نەیتوانیوە بەرچاوی گرێدراوی چارەنووسی پارچە بە پارچەی ئەم وڵاتە لێکترت، لێبگرێت و لە قووڵایی مێژوو بە ڕاشکاوی هاواری پێویستی و ناچاری یەکیەتی کەسایەتییە مەزنەکانی کورد و شەهیدانی سەربەرزی وڵاتت دەبیسی*.
تۆ کە لە باشوور، باکوور یا رۆژئاوای بەڵام رووداوەکانی رۆژهەڵات دڵ و هەست و هەناوت دەهەژێنێ. کوردی رۆژهەڵاتی بەڵام پەرۆشی باکووری ئاگرین، وێنای شۆڕشگێڕی و ڕچەشکێنی دوێنێی باشوور و دیلی دولار و دیناری ئەمڕۆی و ئاسۆی لێڵی داهاتووی رۆژئاوا خەو و خۆراکی لێت تاڵ کردووە.
تۆ باوکی ماندوویی و ئێش و ئازاری بێوچان و دایکی هۆرە و لاوک و حەیرانی چەرخی چەپگێری دەوران، برا گەورەی خەم و خەفەت و خوشکی بەش خوراوی بەشداری دەستدرێژی و شەق و شەپڵاخە و سووتان و لێدان!
یا تۆ لاو و تازەلاوی هەژاری نەداری بێکاری شەرمساری خزم و خێزان و ماڵ و منداڵ؛ تاوان و هۆکاری دەستی خاڵی و هێزی بەتاڵی تۆ دوژمنی داگیرکەرە نە نەتەوە و نیشتمان و ئایینی وڵاتێک کە شەڕ و پێکدادانت لە گەڵ ئازاری هەژاری وەک هێرش و بەرخۆدانی سەربازێکی نیشتمان بەرز دەنرخێنێت و پەروەردەی چینی هەژار و چەوساوە بە رۆڵەی راستەقینەی دەربازکەری خۆی و شەهیدی زیندوو لە قەڵەم دەدات.
یا کوچەرێکی هەڵگرتووی سەر لە پێناوی وڵاتی کە لە پەنای برینی بەرینی بێ بڕانەوەی غوربەت، خەمی رۆژهەڵات، خەیاڵی باشور و هەواڵی باکوور گەمارۆی داوی و چوارمێخەی خاچی نەفرەتی مێژوویی نەتەوەیەکی بندەست و چەوساوە کراوی.
زانایەکی بڵیمەتی وڵات، رووناکبیرێکی رووبەرووی مەینەت و نەهامەتیە نەبڕاوەکانی کومەڵگا، پسپۆڕێکی تەرا و تەنیا و وێڵی دۆزینەوەی دوو وشە لە پەستووی قوتابخانەکان و دیوەخانی ماڵپەرەکان بۆ بەرز کردنەوەی بایەخ و شەرەفی نەتەوەکەت، شاعیر و شارەز نەییەکی شەق و شڕی دڵپڕی ئوناق لە گەروو یان مامۆستایەکی باڵ و پەر وەریوی سەرسپی و گیرۆدەی سیستەمی گلاراوی پەروەردەیت و هەموو هەلە رەخساوەکان بۆ بەختەوەری خۆتت خستووەتە خزمەت نیشتمان و داهاتووی تاڵ و تاریکی منداڵانی پێخاوسی.
یا ژینگەپارێزی دامرکێنەری تینی ئاگری کینەی داگیرکەر و تەماحی بێ سنوور لە دار و دەوەن و کەش و کێفی وڵاتی دەسبەسەر کراوی سووچی بەندیخانە یا کۆنە پێشمەرگە و پارێزەری وڵاتی پیری پەککەوتووی سووچی ماڵ یا نەخۆشخانەی.
لە بەرزایی چیاکانی باکوور و رۆژئاوا یا دەشتایی سنوورەکانی باشوور، لە نێو جەرگەی خەبات و بەرخۆدان و لە جلی پیرۆزی پێشمەرگە یا گەریلا، بە راپەرینی رۆژهەڵات لە خەو و خەمۆکی دەیان ساڵە هەستت دەکوڵێ و دەست و چەکی چەق بەستراوت لە سەر مێشکی دوژمنی داگیرکەر یا تیروریستی سووکەسەر دەلەرزێ.
تۆ هاورێ و هەڤالی تێکۆشەری کۆڵنەدەری خۆنەویستی خۆشەویست و ویردی سەرزمانی گەورە و بچووک و پیر و لاو و ژن و پیاوی ئەم وڵاتە.
خوێن و جەوهەری ئەم پێنووسە، گەوهەری تۆ نەبێت، بە قەرای بارینی ویردی وشەکانی وشک دادێت و بە چاوی چەق بەستراو لە چۆڵایی سەرلووتکەی چیاکان، بە تەمای سەرهەڵدان و هەڵکشانی دووبارەی بەژن و باڵای بەرز و نەلەرزت، ڕاست و ڕەق ڕادەوەستێت!
تۆ کە دوای بیستن و بیرکردنەوە لەو دروشمانە و وێنای قوربانی بوون و کۆمەڵکوژی و کارەساتە مێژووییەکانی نەتەوەکەت، ترس و سامێکی ڕۆحرەتێن، کوشەندە و درێژخایەن سەرانسەر رۆح و جەستە و بوون و نەبوونت داگیر دەکات!؟
قورسایی ئەرک و مۆتەکەی ترسێکی وەها لە خەویشدا، بەرۆکت بەرنادات و تۆقاو و دەسەپاچە، لە هەستانا داماوی رۆڵەکانت لە خەو ڕاپەڕێنی و توند لە ئامێز بگریت یا بنەماڵە و خزم و خێزان و کۆڵان و شەقام یا نە هەموو شار و گوند و هاوسا و هاوزمانەکانت بانگێشتی پەناگە کەیت و بە وەبیرهاوردنی مێژووی کارەساتباریان، لە چارەنووسێ رەش و مەترسییەکی تری شاراوەی هاوچەرخی، ئەمساڵ، ئەمڕۆ یا بەیانی، یا نە هەر ئێستا وریا و هوشیاریان بکەیت.
بە ئاگاداری و ئاگادارکردنەوەی هاوکات و دەستبەجێ، لانی کەم، بەش بە حاڵ و بەرپرسایەتی و ئەرکی سەرشانی خۆت، لە قەبارەی دێزی کارەسات کەم کەیتەوە و بیخەیتە سەر وشیاری نەتەوەیی و بەختەوەری کۆمەڵگایەکی بندەست و بێ ئیزن و ئیرادە و گیرۆدەی دەستی داگیرکەرانێکی بێویژدان کە بۆ چاوترسنەکی و تووتک ترسێن کردنی شارۆمەندانی پایە بەرزتر و خۆپیشاندەری بەربڵاویان، کەسیان بەر پەل ناکەوێت کوردی هەژار و کوردستانێک نەبێت کە وەک مەڵبەندی کوفر و پێگەی دوژمنان، ئەزموونی کۆمەڵکوژی و خولقاندنی کارەسات بۆ سەقامگیر کردنی دەسەڵاتی نارەوا و زاڵ کردنی بەها دواکەوتووەکانیان، لە بڕوانەمەکانیاندا تۆمار و زۆرە.
ترسی تۆ و دەیان میلیون کوردی بەشخورای تری وەک تۆ نەک هەستێکی کاتی و ترسێکی بێ بنەمای نابەجێ و ناماقووڵ بەڵکوو سەرچاوەی بیرێکی بنەرەتی و درێژەی داچوون و پێداچوونێ لە مێژووی کارەساتباری نەتەوەی کورد و دەستدرێژی و تاڵانچییەتی نەتەوەکانی دراوسێ، دۆخ و باری نالەباری ئێستای ناوچە و کەمتەرخەمی و لاوازی نەتەوە باڵادەست و زلهێزە بێ هێزەکانی ئەمرۆکەی دونیا و رۆژهەڵاتی ناوینە.
بە پێچەوانە شانازی و شاگەشکە بەو چەشنە دروشمانە نە تەنیا هیچ بیر و بنەمایەکی زانستی و لۆژیکی نییە بەڵکوو سەرانسەر ناماقووڵ و نابەجێ و تەنانەت مەترسیدار و یەکێک لە گرنگترین هۆکارەکانی بندەستی و بێ دەر و پەیکەری کوردە لە مێژووی هاوچەرخدا!
بۆ سەلماندنی ئەو راستیە شاراوە سەرەتا واتا و پێناسەی وشەی “دروشم” لە کوردی و “شوعار” لە فارسی لە چەند فەرهەنگێکی بەناوبانگدا ببینین؛
دروشم لە کوردیدا:
قسە یا بڕیارێک کە ناچێتە بواری جێبەجێ کردنەوە!
شعار لە فارسیدا:
سخنی آرمانی کە در عمل نمی گنجد!
واتە وتە یا قسەیەکی خەیاڵی کە ڕەنگی کردەوە نابینێت!
هەروەها بروانین بۆ بژاردەی وتەکانی بەناوبانگترین رووناکبیران و نووسەران و شارەزایانی فارس و زانایانی ئێرانی سەبارەت بە نەتەوەی کورد لەم چەند ساڵەی دواییدا؛
- هیچکس حق ندارد خود را از کوردها ایرانیتر بداند!
کوردها مرزداران غیور و پاسداران واقعی ایرانزمین هستند. - کوردستان استان فرهنگی و پایتخت فرهنگ و فولکلر و موسیقی است!
- کوردها نماینده و سفیران واقعی قلمرو و فرهنگ والای ایران و ایرانیند!
- شمال و جنوب و غرب کوردستان بزرگ متعلق به ایرانزمین و چون کودکانی جدا شده از دامن مادر هستند که روزی به آغوش مام میهن باز خواهند گشت.
روزی که کوردها خود را جدا از ایران بدانند باید فاتحه ایران و ایرانی را خواند*!
ئێران و ئێرانی بە واتای راستەقینەی وشە و نەتەوەی فارس بە تایبەت و بە گشتی بە نەتەوەیەکی دروشمی و بێ کردەوە ناسیاون، نازناوێکی باڵانوێن و ناوبانگێکی وەها کە تەنانەت خۆیان و رووناکبیرانیشیان، لە ڕەخنە و نووسراوەکانیان دا تاونەوتاون(زوو بە زوو) دەیکوتنە نێوچاوی یەکتردا!
بەبوونی نموونە و وێنەی بێژمار،ئاماژەیەکی کورت و موختەسەر بە جیاوازی وتار و رەفتار یا هەڵسوکەوت و کردەوەی ئێرانی و فارسەکان سەبارەت بە کوردی رۆژهەڵات و نەتەوەی کورد بە گشتی، لە مێژووی چەند ساڵی رابردوو، بە باشترین شێوە هۆکارەکانی ئەو تایبەتمەندی و ناوبانگە نەرێنییە دەنوێنێت. وێنەی راستەقینەی تاوان و تاڵانی ئەو کاتەی ئێرانییەکان بۆ پاراستنی مەڵبەند و دەسەڵاتێکی کۆنی لە دەست چوویی کوورشی هەخامنشی و جەمسەری فیردەوسی بەرینی پێرشیای مەزن بە جوانترین شێوە لە پێناسە و ناساندنی عەجەم (فارس و ئێرانی ) وەک گەورەترین مەترسی بۆ سەر نەتەوەی کورد و پێشنیار و ئاگاداری و هوشدار و وشیاری پێشەوای مەزن لە وەسیەت و میراتی بەنرخی خۆیدا ڕەنگی داوەتەوە. ئەوانەی کە وەسیەتی پێشەوایان خوێندە و لە بیریانە باش دەزانن کە ناوەرۆک و ئامانجی راستەقینە و جێبەجێی وەسیەت، وشیاری و ئاگاداری مەترسی و بێ بەڵێنی و پەیمان شکێنی عەجەمە بۆ سەر نەتەوەی کورد. - چەند بەشێکی پچڕاو و نەگۆڕاو لە دەقی وەسیەتی پێشەوا:
[لە ناو هەموو دوژمنانی کورد، دوژمنی عەجەم (فارس و ئێرانی) لە هەموویان مەلعوونتر و زاڵمتر و خوانەناستر و بێبەزەییترە! لە هیچ تاوانێک بەرانبەر گەلی کورد دەس ناگرێتەوە. بە درێژایی مێژوو لە گەلی کورد غەرەز و کینەی ریشەداری بووە و هەیەتی. بروانن تەواوی گەورە پیاوانی گەلەکەتان، لە ئیسماعیل ئاغای شوککاکەوە بیگرە تا جەوهەر ئاغای ئیبراهیم و حەمزە ئاغای مەنگوور و چەندین و چەندین مرۆڤی دیکە، هەموویانی فریو دا*. ئارامیان کردن و خەڵکیان لە پشتیان کرد و زۆر نامەردانە کوشتنیان! هەموویانی بە سوێند و قورعان فریو دا کە گوایە عەجەم نییەتیان خێرە و چاکە دەکەن. بەڵام کوردی خۆشباوەر بە سوێند و سۆزی عەجەم فریوی خوارد و باوەڕی پێ هێناون. بە درێژایی مێژوو کەس نەیدیوە تەنانەت بۆ جارێکیش عەجەم بە سوێند و وادە و ئەو پەیمانانانەی کە بە سەرانی کوردی داوە وەفا بکات و وادەکانی بە جێ بگەیەنێت. هەمووی درۆ و فێڵ بووە! عەجەم نە بە خوا باوەری هەیە نە بە قورعان و …..]
لە دواییدا پێشەوای مەزن بە ڕاشکاوی ڕادەگەیەنێت کە پێش هێرش، ئێرانییەکان بە سوێند و سووری بەڵێنیان دابوو کە ئەگەر خۆی بە دەستەوە بدات ناهێڵن تەنانەت خوێن لە لووتی منداڵێکی کورد بێت و هۆکاری راستەقینەی مانەوەی مێژوویی و بێ وێنەی پێشەوا لە نێو نەتەوەی خۆیدا، وەک مەسیحێکی لە خاچ دراو، خەیاڵی دەربازکەری نەتەوە و کۆمەڵگای خۆی بوو نەک بە پێی شیکاری نەشیاوی هەندێک سیاسەتوانی بێویژدانی کورد فەوتاندنی رێبەرێکی مەزن و بە فیڕۆدانی کاریزمای کەموێنەی کەسایەتی و بەختێکی تری بەختەوەری و دەسەڵاتداری کورد لە داهاتوودا و لە کاتێکدا پیشەوەری و فرۆکەی ڕووسی لە تەورێزدا بە تەما و دەسخڕە (بێ ئاکام) مابوون! بە ئەگەری دەربازبوون و رزگاری پێشەوا بە دڵنیایی هەر ئەو چەکە کوردانە بە تاوان و ڕەخنەی ترسان و هەڵاتن پێشەوایان دەڕووخاند!
ئەنجامی سوێند و بەڵێنی ئەو کاتەی ئێرانییەکان لە مێژوو و مێشکی هەر کوردێکی نیشتمانپەروەر دا تۆمارە و پێویست بە ئاماژە ناکات.
بگەڕینەوە بۆ سەردەمی کۆتایی شا و پاشایەتی و شۆرشی بەربڵاو و لەناکاوی نەتەوەکانی نیشتەجێی ئێران و کارەساتێکی تری کوردی چەوساوە و تاوانێکی تری فارس و ئێرانی و وێرانی بە پەت و سێدارە و تۆپ و تەیارە؛
بە فەرمانی جیهادی ئیمام خومەینی و ئاگاداری دەرنەهاوردنی پێڵاو تا داگیرکردن و پاکسازی [بە قەولی ئیمام] کوردستان هەر لە شومال و باکووری ئێرانەوە بیگرە تا ئیسفەهان و یەزد و تاران و مەشهەد، سوپایەکی زل و زەبەلاحی مەترسیدار و پێکهاتوو لە دەمارگرژترین و بناژۆخوازترین مرۆڤگەلی گوێڕایەڵ و بێ ئیختیار – ماشین و مەکینەی کوشتار – بە دواهەمین و پێشکەوتووترین فرۆکە و چەکی سەندراوی کاتی شا، ڕەوانەی کوردستان و مەڵبەندی کوفر و دوژمن ( بە قەولی ئیمام) دەبن و سەرخۆش لە شۆڕشێکی تازە سەرکەوتوو و وێنای راست کردنەوەی سەروەری لە دەست چوویی ئیسلام و ئایین و مودیریەت و ڕیکخستنی نوێ جیهان – ئەوەی دەستی گڵاویان بگات و نەگات، لە شار و گوند و بەند و باغەوە بیگرە تا شایی و پرسە و رەشبەڵەک و لە ژن و منداڵ و لاو و پیاوەوه بیگرە، تا پیر و پەک کەوتوو و نەخۆشی داکەوتوو، بە هێرش و هەڕەشە و گوشار و گەمارۆ، تاڵان و وێران و ڕماو و بێ گیان دەکەن و لە شوێنی خۆیان وڵاتێکی سووتاو و زووخاوی نەتەوەیەکی بە کۆمەڵ کوژراوی وەها بەجێ دێڵن کە بە ئاستەم بتوانیت خێزان و بنەماڵەیەکی رۆژهەڵاتی بدۆزیتەوە کە لەو کات و کارەساتەدا خۆشەویستێکی لە دەست نەدابێت و پرسە و ماتەمێکی نەگێرابێت!
نموونەی زۆری هەڵسوکەوتی ئێرانییەکان لە راستی و لەمەڕ گەلی کورد لە مێژووی کۆن و هاوچەرخ لە دەرەوەی تاقەتی ئەم وتارە و بۆخۆی کتێب و پەرتووکێکە. هەر لە کوورشی هەخامەنشی و ڕفاندنی دەسەڵات لە مادەکان تا وردەکارییەکانی کارەساتی کیمیابارانی هەڵەبجە و سوپای پاسداران یا هێرش و مەترسی بناژۆخوازانی ئایینی عەجەم! و دەعبای داعش بۆ سەر باشووری کوردستان و شاری هەولێر و دروشمی رزگاریدەری ئێرانی لە هەڵەبجە و هەولێر!
دەرخستنی ریشەی شاراوەی راستییە ناراستەکانیەکانی ئەو هێرشە، بە تایبەت بۆ بەرچاوی هەڤاڵانی باکوور و هاورێیانی باشوور کە دوور لە هەواڵ و و سیمای راستەقینەی ئێرانییەکان و لە گەمارۆی پروپاگەندە و بانگەشەی بەربڵاو و بێوچانیان و بە ناو برایەتی گەلان و خەبات دژ بە گەندەڵی و تەماحی بێ سنووری سەرمایەداری و سەرمایەداران، ئێرانییەکان بە رزگاریدەری ناوچە و دەربازکەری جیهان لە سەرمایەداری و ئیمپریالیزم دەزانن، پێویستی بە شیکارییەکی تێر و تەسەل و خوێندنەوە و لێکۆڵینەوەی چەندین سەرچاوەی نەناسراو یا کەمتر ناسراو بەوردییە. بە تایبەت وردەکارییەکانی سەردەمی بە دەسەڵات گەیشتنی کۆماری ئیسلامی و دارژانی بناغەی بناژۆخوازی ئایینی لە رۆژهەڵاتی ناویندا.
بە هۆی درێژە نەکێشانی بابەت و هەندێ هۆکاری تایبەتی تر و لە پەراوێز و کوتایی ئەم وتارەدا، سەرنجتان بۆ ئاماژەی کورت بە چەند ئەزموون و راستی شاراوەی مێژووی کۆن و هاوچەرخ ڕادەکێشم بەڵام لە پێشدا بۆ بەدڵنەگرتنت لە تۆ خوشک و برای موسڵمان و لەخواترسی بەرپرسم، ئەگەر لە ۱۵۰۰ساڵ مێژووی ئیسلامدا دیاردەیەکی ترت بەدی کرد کە وەک بناژۆخوازی ئایینی کۆڵەکەی ئیسلام و موسڵمانی و رۆحم و بەزەیی و هێزی دڵ بلەرزێنێت و بناغەی دونیاپەرەستی و بەرژەوەند خوازی و کوفر و کەڵاکی و کەرەستە کردنی مرۆڤەکان بۆ بەرهەمی فرەتری کارخانە و کارگاکان – بە نێوی ئاسایش و بەرەنگاری مەترسی تیرۆریزم – ئەستوورتر بکات، تکایە با ئێمەیش بیناسین:
– دابەشبوونی فەلسەفی و ئیدێولۆژیکی گۆی زەوی بە سەر دوو جەمسەری رۆژهەڵاتی و رۆژئاوایی.
– زاڵبوونی فەلسەفی و ئیدئولۆژیکی رۆژهەڵاتی زەوی و و پەیرەوی و گوێرایەڵی رۆژئاواییان لە سەرانسەری مێژووی ڕابردوو و تەنانەت هاوچەرخ*.
- دواکەوتوویی رواڵەتی رۆژهەڵاتییان لە مودرنیتە و نوێخوازی و راستی دامەزرانی بناغەی رونسانس و نوێخوازی لە رۆژهەڵات و بە تایبەت لە جیهانی ئیسلامدا سەدان ساڵ پێشتر و لە کاتێکدا کە قەشەکان لە رۆژئاو هەر چەشنە نوێخوازی و زانستێکی پێشکەوتوویان سووچەستۆ و زانایانیان گۆشەنشین دەکرد یا لە سێدارە دەدا! بە پێچەوانەی نوێخوازی رۆژئاواییان کە بە خێراییەکی سەرسام هێنەر و منداڵانە سوروشت و یاساو رێساکانی پێشێل دەکات و هەست و سۆز و خۆشەویستی مرۆڤەکان هیچ دەورێکی تێدا نابینێت، رونسانسی رۆژهەڵاتیان زۆر جیاوازتر و سروشتی تر و بە خێراییەکی کەمترەوە دەستی پێکردبوو و کارەساتە سرووشتیەکانی وەک گۆرانی لە ناکاو و گەرم بوونی کەش و هەوا و توانەوەی سەهۆڵە جەمسەریەکان و کون بوونی تۆکڵەی ئوزۆن لەو کاتەوە دەستی پێکرد کە رۆژئاواییانی کەم ئەزموون و بێتاقەت نوێخوازی و رێبەریان لە رۆژهەڵات رفاند!
- دواکەوتوویی و پاشڤەرۆیی (ارتجاعی) چەند هەزار ساڵەی بریار و بەها بەنرخ و بنەرەتیەکانی چینی باڵادەست و کۆمەڵگای رۆژئاواییان لە بەراورد دەگەڵ رۆژهەڵات و موسڵمانان؛ بۆ نموونە بیروبروای یەکسانی و جیاواز نەبوونی مرۆڤەکان لە جیهانی ئیسلام و فەلسەفەی رۆژهەڵاتدا پتر لە ۱۴۰۰ ساڵە سەقامگیر بووە و کوێلەداری وەک تاوانێکی مەزن سووچەستۆ بووە بەڵام لە قووڵایی دەروونی ناهوشیاری زانایان و چینی باڵادەستی رۆژئاواییان بە تایبەت و کۆمەڵگا و کەسایەتییە کاریگەرەکانی بە گشتی، شازادە و پرنسس و پاشا جیاواز و لە خوێنی خودایانن و نە تەنیا کوێلەداری سووچەستۆ نەبووە بەڵکوو لە ئاستێکی بەرزتر و بە شێوەی چەوساندن و کوێلە کردنی نەتەوە لە باتی کەس و کەسایەتی، شاراو و هەڵپێچراو لە فورمی ئیستیعمار و ئاسیمیلاسیۆن، ریشەی ئەستووری خۆی دەنوێنێت و لەگەڵ بارودۆخی کارەساتبار و مەترسیداری سروشت و دونیای ئەمڕۆ، کەم ئەزموونی و نەشیاوی رۆژئاواییان بۆ رێبەری دەسەلمێنێت!
- کڵۆڵی دیموکراسی لە کونتروڵ و سنوودارکردنی حرس و تەماحی لە ڕادەبەدەر و زاڵبوونی دەوڵەمەندان و بەرپرسەکانی کارگە و کارخانە مەزنەکان بە سەر دەوڵەت، نەتەوە، دەسەڵات، سیاسەت، میدیا و تەنانەت مەبەستدار کردنی سیستەمی پەروەردە و زانکۆ و ناوەندە زانستییەکان بە ئاراستە و رەوگەیەکی دیاریکراوی کۆنەپارێز و ڕووتۆ بوو لە هەر چەشنە مەترسییەک بۆ سەر چینی باڵادەست و بەها گونجاوەکانی کۆمەڵگا!
- دیاری کردنی نەزمی نوێ و سیاسەتە بنەڕەتی و درێژماوە جیهانییەکان لە سەر بنەمای تەماح و پارەی زۆرتر نەک زانست و لێکۆڵینەوە و راستی ڕادەستی زانایان و پسپۆڕانی ناوچە و جیهان.
- رێکخراوی و دیسیپلینی بنەرەتی جیهانی نوێ بە پێچەوانەی ناوەکەی بەرهەمی بیر و بۆچوون و ئایدولۆژیە بە گشتی مەزهەبی یەکانی عیساییەکان و جوولەکەکانی پاش زنجیرە شەڕە خاچییەکانە. درێژخایەن ترین و مەترسیدارترین شەری نێونەتەوەیی مێژووی مرۆڤایەتی کە بە بڕوای زۆرێک لە توێژەرانی مێژوو، لە کۆڵ بوونەوەیان ئاستەمە و تا ئێستا و دەیان ساڵی تریش لە درێژەیان دەبێت.!
– گێل و گەوجی و هەڵەی زەقی ماسۆنە زلهێزە دەوڵەمەندە خاچ و جوولەکەکان بۆ داڕشتن، دامەرزاندن و پەروەردەی یەکەمین بناژۆخوازانی موسڵمان بە مەبەستی سەرەکی دەست گرتن بە سەر مەکۆی جیهانی سووتەمەنی و وزەی سروشتی و ئامانجی پەراوێزی سڕینەوەی مەڵبەندی بەرینی ئیسلامی و مێژووی هەزار و سێسەد ساڵەی سەروەری ئیسلامی راستەقینە لە بیر و زەینی موسڵمانان بە تایبەت، و رۆژهەڵاتی زەوی بە گشتی.
- بەرهەڵستی و پێداگری لە رادەبەدەی شای ئێران – وەک بەرپرس و داڕێژەری سیاسەتە بنەرەتی یەکانی رێکخراوەی وڵاتە خاوەن وزەکان، ئۆپێک – لە سەر هەرزانی سووتەمەنی و گرانتر کردنی ساڵ لە دوای ساڵ. ( بروانن بۆ دواهەمین وتووێژەکانی شا لە گەڵ بی بی سی و میدیاکانی تر)
– ئەگەر و مەترسی و دەستپێکێک بۆ داڕووخانی سیستەمی سەرمایەداری و بندەستی و سەرکوتی دیسانەوەی رۆژئاواییان، خاچپەرستان و جوولەکەکان.
- هۆکاری راستەقینەی دارووخانی پاشایەتی و سەرکەوتن یا سەرخستنی کوماری ئیسلامی و گەرانەوەی خومەینی لە فەرەنسە، بە فرۆکەی فەرەنسەوی و گیرفانی پڕ لە گەرەنتی دەسەڵاتێکی درێژماوە بە شەرتی تێکەڵاو و تێوەگلانی پیرۆزترین و بنەڕەتیترین بەهاکانی ئایینی ئیسلام و فەلسەفە و تەریقەتی عیرفان و بوودیسم و کونفسیۆسی رۆژهەڵاتی زەوی لە گەڵ سیاسەت بە واتای درۆ و فێڵ و فەریب و بەرژەوەند خوازی!
- ئایین یاسا و ڕێسای ئاسمان و جیهانی مەلەکووت و عالەمی ماوەرای دوای مردنە و سیاسەت یاسای ژیان لە عەرز و عالەمی مادی و جیاوازیان هەر لە عەرزەوە تا ئاسمان، تێکەڵاوی مەترسیداری ئایین و سیاسەت، زاڵبوون و دەسەڵاتداری ئایین، ئەزموونی تاڵی تراژیدیای رونسانسی رۆژئاواییان و داڕشتنی دیسانەوەی لە رۆژهەڵاتی ناوین.
- بە پێچەوانەی بیر و وێنای گشتی و زۆرینەی موسڵمانان و دەسەڵات و هیژمونی بەربڵاوی ئەمرۆکەی، پێ و پێگەی و رەسەنایەتی شێعە و شیعیسم لە مێژووی ئیسلام و ئەزموونی موسڵمانیەتی و فەلسەفەی رۆژهەڵاتیشدا زۆر کەم ڕەنگە و نە تەنیا رەگ و ڕیشەیەکی ئەستووری ئەوتۆی نییە بەڵکوو لە ناو موسڵمانەکان و ناوچەی رۆژهەڵاتی ناوین بە تەواوی بێ ڕیشەیە و وەک وەهابیەت و بەهاییەت ئەگەر سووکە ڕیشەیەکیشی بێت دەگەڕێتەوە بۆ رۆژئاوا و ستراژیە بناغەیی و ئیستیعماریەکانی لە ناوچە و لە سەردەمی سەفەوییەکان.
۹) سارێژی بوغز و برینی کۆنی شکست و دۆڕاندنی ئورشەلیم و سەرکەوتن و دەستدا گرتنی موسڵمانان بە سەر مەڵبەند و ئەرزی پیرۆز و قیبلەی جوولەکە و خاچپەرستاندا.
۷) ئەگەری هۆکارێکی بنەڕەتی و شاراوە و جیا لە وێنای گشتی بۆ نەفرەتی مێژوویی دابەش بوون کوردستانی مەزن وەک وڵاتی فەرماندە و فەرماندەر و ڕەمزی سەرکەوتنی موسڵمانان.
۱۲) ئاستەمی یەکگرتن و یەکپارچە بوونی دووبارەی کوردستان و لە خەو ڕاپەڕین و هەستانەوەی رۆژهەڵاتی جیهان بۆ وەرگرتنەوەی باڵادەستی هەمیشەیی خۆی لە مێژووی هاوچەرخ و لانی کەم لە داهاتوویەکی نزیکدا. - …
ڕەزبەر ۲۷۲۲
عەلی بازیار
